Ջուլիետայի ճամփորդական պատմությունը սկսվել է երիտասարդական փոխանակման ծրագրերից։ Հենց դրանց շնորհիվ է նա ծանոթացել տարբեր մշակույթների, հանդիպել մարդկանց աշխարհի տարբեր անկյուններից և ձեռք բերել առաջին ճամփորդական փորձառությունը։ Հետագայում Ջուլիետան սկսել է ճամփորդել նաև ծրագրերից դուրս՝ բացահայտելով նոր քաղաքներ, ուսումնասիրելով դրանց պատմությունն ու մշակույթը։
Կուտակած փորձն ու օգտակար խորհուրդները նա ներկայացնում է Instagram-ի իր էջում՝ ոգեշնչելով մարդկանց ինքնուրույն կազմակերպել իրենց ուղևորությունն ու ավելի համարձակ ճամփորդել:
Ջուլիետան երբեք միայնակ ճանապարհ չի ընկնում։ Նրա խոսքով՝ ճամփորդության ամենագեղեցիկ մասը տպավորություններով կիսվելն է, երբ կողքիդ մարդիկ են, որոնց հետ կարող ես նոր վայրեր այցելել, ապրել նոր զգացողություններ և ստեղծել հիշողություններ:
