Հայաստանը Մարս մոլորակի երկրաբանական նմանակն է. ահա այս հիմնավորմամբ Հայաստանն այս գարնանը մեկ ամսով կդառնա Մարսի անալոգային հետազոտությունների անցկացման վայր։ Հայկական և Ավստրիական տիեզերական ֆորումների համագործակցությամբ անցկացվելիք «AMADEE-24» դեպի Մարս 14-րդ միջազգային սիմուլյացիայի կազմակերպչական թիմերի անդամներն օրերս հյուրընկալվել էին Ավստրիայում Հայաստանի դեսպանությունում։
Սիմուլյացիայի շրջանակում միջազգային անձնակազմը մեկ ամիս կմարզվի ժայռոտ բարձրադիր սարահարթում, որը շատ առումներով նման է Մարսի վրա գտնվող սարահարթերին։ Առաքելությանը կմասնակցի 250 գիտնական Հայաստանից և արտասահմանից:
Հայաստանի տարածքը շատ է նման Կարմիր մոլորակի հրաբխային մակերեսին, իսկ գտնվելու վայրը շատ հարմար է փորձերի համար։ Ավստրիական տիեզերական ֆորումի իրականացրած 14-րդ մոդելավորման ընթացքում կփորձարկվեն այն տեխնոլոգիաները, որոնք ապագայում կուղարկվեն դեպի Մարս հետազոտական առաքելություն նպատակով:
