Ուսումնասիրելով պատմությունը՝ կտեսնեք՝ ամենադժվար իրավիճակում մարդիկ չեն դադարել ստեղծագործել։ Հատկապես հիմա, երբ բոլորս խոսելու, լսելու, շփվելու կարիք ունենք, թատրոն գնալը շատ օգտակար կարող է լինել։ Վանաձորի թատրոնի դռները չեն փակվել ու չեն փակվելու։ Հոկտեմբերի 7-ին և 8-ին թատրոնում տեղի ունեցավ Ֆլորիան Զելլերի «Որդին» ներկայացման առաջնախաղը։
Ֆլորիան Զելլերը գրել է «Հայրը», «Մայրը», «Որդին» եռերգությունը, որում տեղ գտած պիեսները սյուժետային առումով որևէ կապ չունեն միմյանց հետ, բայց ցույց են տալիս ընտանեկան հարաբերություններն այլ լույսի ներքո՝ ներկայացնելով ընտանիքի անդամներին առանձին-առանձին, անդրադառնալով այն խնդիրներին, որոնց կարող են բախվել նրանք։ Ֆրանսահայ ռեժիսոր Սաթէ Խաչատրյանը եռագրությունից ընտրել է միայն «Որդին» պիեսն ու բեմադրել այն։
Դե ինչ, այս էպիզոդում կպատմեմ Ֆլորիան Զելլերի և «Որդին» պիեսի բեմադրության մասին, կներկայացնեմ հայ-ֆրանսիական համագործակցությունը, ինչու է ֆրանսահայ ռեժիսորն այս ստեղծագործությունն ընտրել, ովքեր են դերակատարները և ոչ միայն։
