Անդրանիկ Տողրամաջյանի ընտանիքը 90–ականներին է Հայաստանից մեկնել։ Թեվ ինքը ծնվել և մեծացել է Ռուսաստանի Ուֆա քաղաքում, բայց հայրենիք վերադառնալը երազանք է եղել, միշտ փորձել է մոտ լինել հայկական մշակույթին ու պատմությանը։ Փոխանակման ծրագրով սովորել է Փարիզում հետո Մոսկվայում ուսումը շարունակել միջազգային հարաբերությունների ֆակուլտետում։ 2022 թվականի հունվարին որոշել է տեղափոխվել Հայաստան։ Ասում է՝ միշտ մտածել է հայրենիքում ապրելու մասին և իր որոշումը կապված չէ ռուս–ուկրաինական պատերազմի հետ։ SkyLabs կրիպտոարժույթների տերմինալների մարքեթինգի տնօրենն է։ Ասում է՝ կրիպտոարժույթների ոլորտն ամբողջ աշխարհում զարգանում է և Հայաստանում դրանցով գործարքներ կատարող մարդիկ ավելանում են։ Նրա խոսքով՝ կրիպտոարժույթները շատերի համար անծանոթ և ոչ վստահելի են։ Անհրաժեշտ է դրանց շրջանառությունը կարգավորող օրենք ընդունել, այդ դեպքում ավելի հեշտ կլինի հետևել դրամական հոսքերին։
Անդրանիկը նաև TunMun․am անշարժ գույքի ծառայության համահիմնադիրն է։ Այս նախագիծը ընկերոջ հետ հիմնադրել է մի քանի տարի առաջ «Ներուժ» ծրագրի շրջանակում։ Այն առաջարկում է բնակարանների վարձակալություն, հյուրանոցի ամրագրում Հայաստանում կրիպտո տարբերակով:
Հայաստանը միակ վայրն է, որտեղ ցանկանում եմ ապրել,– ասում է Անդրանիկը և հավելում՝ հաճախ է շրջում Հայաստանում, սիրում է բնության գրկում ժամանակ անցկացնել։ Քաղաքի եռուզեռից հեռու փոքրիկ տուն է կառուցում Լոռու մարզի Ֆիոլետովա գյուղում։ Մի բնակարան էլ Երևանում է գնել, որտեղ հիմա ապրում է։
Անդրանիկը պատրաստվում է սեպտեմբերին ուսումը շարունակել ասպիրանատուրայում։ Հայ-ռուսական համալսարանում կրիպտո և ֆինանսական արժույթների մասին գիտական աշխատանք է գրելու։ Ասում է՝ ծանոթներ ունի, որոնք փորձել են ապրել Հայաստանում, բայց չի ստացվել։ Նա խորհուրդ է տալիս չհանձնվել, վստահ առաջ գնալ ու հաղթահարել դժվարությունները։
