Համացանցի շնորհիվ անգամ արվեստն է հասանելի դարձել։ Կարող ես մեկ բաժակ թեյ կամ սուրճ վերցնել, միացնել համակարգիչդ ու որևէ ներկայացում դիտել։ Իհարկե, սա հրաշալի հնարավորություն է, եթե չես կարող ճամփորդել, այցելել տարբեր թատրոններ, բացահայտել նոր հորիզոններ. բայց սա ինձ համար չէ։ Կարծում եմ, ոչ միայն ինձ, այլև թատրոն սիրող ու այցելող շատ մարդանց համար չէ։ Այս դեպքում մեզ գալիս են օգնության միջազգային թատերական փառատոնները, որոնք ամեն տարի անցկացվում են Հայաստանում։
Ապրիլի 28-ից մայիսի 17-ը Երևանում, Գյումրիում և Աբովյանում 21-րդ անգամ կանցկացվի «Արմմոնո» ամենամյա միջազգային թատերական փառատոնը: Փառատոնի նախագահ Մարիաննա Մխիթարյանը խոսելով այս տարվա ծրագրի մասին շեշտում է՝ կենտրոնում հայ երիտասարդ ստեղծագործողներն են։ «Արմմոնոյին» մասնակցելու հնարավորություն ունեն ոչ միայն թատրոնի երիտասարդ ստեղծագործողները, այլև Երևանի թատրոնի և կինոյի պետական ինստիտուտի ուսանողները։
Դե ինչ, այս էպիզոդում կխոսեմ «Արմմոնո» թատերական փառատոնի մասին, կպատմեմ՝ ինչ ներկայացումներ կան այս տարի ծրագրում, որ երկրներից են մասնակիցները, ովքեր են առաջին անգամ մասնակցում փառատոնին, քանի օր է այն անցկացվելու և ոչ միայն։
