Սյունքի մարզի Խնածախ գյուղից է Սյուզաննա Գյումշուդյանը։ «Վիզուալ ինովիացիոն ստուդիա» ՀԿ կազմակերպած վիդեո դասընթացների ընթացքում սովորել է մեդիագրագիտություն, լուսանկարչական տեխնիկայի հմտություններն ու հասցրել կիրառել դրանք։ Նա փոքրիկ տեսանյութերով պատմում է գյուղի բնակիչներին անհանգստացնող խնդիրների մասին։ Առաջինը ջրի խնդրին է անդրադարձել, բայց հետո հասկացել, որ գյուղում ճանապարհների հարցն ավելի լուրջ է։
Սյուզաննան սովորում է 12–րդ դասարանում։ Մտադիր է ընդունվել Երևանի պետական համալսարան ու թեև ամեն օր ավելի է հմտանում տեսանյութեր պատրաստելու գործում, բայց իրեն լրագրության աշխարհում չի պատկերացնում։ Ուզում է հոգեբան դառնալ և իր մասնագիտությամբ նեցուկ լինել մարդկանց։
Երիտասարդ աղջիկը Խնածախի դպրոցում կամավորական աշխատանք է կատարում, երեխաներին անգլերեն է դասավանդում։
Երբ դարձավ «Հզոր միտք« ՀԿ կամավոր մարզը զարգացնելու ուղղությամբ ավելի լուրջ սկսեց մտածել։ Խնածախում ժամանցի կենտրոն չկա, այս հարցը Սյուզաննային շատ է մտահոգում։ Բայց արդեն մտածել է, ինչպես կարելի է լուծել այդ խնդիրը, միայն թե դեռ չի ցանկանում բարձրաձայնել իր ծրագրերի մասին։ Վստահաբար ասում է՝ այն խոչընդոտներին, որոնց ինքն է բախվել, այլ պատանիներ չպետք է հանդիպեն։
Սյուզաննան ասում է, որ իր ակտիվությունը դրական է ազդում համայանքում իր հասակակիցների վրա։ Շատերը սկսել են մասնակցել տարբեր դասընթացների, ներգրավվել կամավորական ծրագրերում։
