Մետաղի բախումներ, շարժիչների աշխատանք, գլորվող անիվներ և լարված սպասում․ Երևանում ռոբոտները դուրս էին եկել մրցադաշտ։ Բարձր տեխնոլոգիական արդյունաբերության նախարարության աջակցությամբ՝ մարտի 17-ից 19-ը Երևանում կայացավ «Ռոբոտների հաքաթոն», որը իր շուրջը համախմբեց Հայաստանի բոլոր մարզերի ներկայացուցիչներին։ Եռօրյա տեխնոլոգիական մրցույթի նպատակն էր խթանել ռոբոտաշինության, ծրագրավորման և մեխանիկայի զարգացումը Հայաստանում՝ միաժամանակ ձևավորելով նորարարական մտածողություն և խրախուսելով թիմային աշխատանքը։
Մրցույթին մասնակցելու հայտ էր ներկայացրել 75 թիմ, սակայն ընտրության արդյունքում մրցադաշտ դուրս եկան լավագույն 36-ը՝ ընդհանուր 123 մասնակից։ Հաքաթոնի ձևաչափը պահանջում էր արագ կողմնորոշում և ճշգրիտ հաշվարկներ։ Մասնակիցները տեղում ստացել էին առաջադրանքները, աշխատել իրենց հետ բերած սարքավորումներով և ընդամենը երեք օրում ստեղծել մրցունակ ռոբոտներ։
Ռադիոհաղորդումը պատրաստեց Սաթենիկ Ավետիսյանը։
