Երկար տարիներ ՏՏ ոլորտում աշխատելուց և դասավանդելուց հետո Աշոտը Ստեփանակերտից վերադարձավ Մուշկապատ՝ այնտեղի և հարակից ևս 3 գյուղերի կյանքը կրթության միջոցով փոխելու և բարելավելու համար։
Ավելի քան մեկ տարի 30-ից ավելի աջակիցների մասնակցությամբ ծրագրի բովանդակությունը մշակելուց հետո ապագա կնոջ՝ Լուիզայի հետ նա հիմնեց «Ես» կրթական հիմնադրամը և սկսեց շրջակա գյուղերի երեխաների համար կազմակերպել ՏՏ դասընթացներ։ Առանցքային հարց էր հենց տեղում մասնագետների պատրաստումը՝ ապահովելով նրանց գործնական գիտելիքներով և հետագայում աջակցելով նրանց ստարտափների ստեղծման գործում։
«Ես» կրթական ծրագրի գործունեության 1,5 տարվա ընթացքում ծրագրին արդեն մասնակցել է 100-ից ավելի երիտասարդ Հաղորտիից ու հարակից Մուշկապատ, Բերդաշեն և Խնուշինակ գյուղերից։
Ծրագիրն իրականցվում է երեք փուլով, որոնցից երկուսի համար անհրաժեշտ է, որ Արցախն ունենա տեխնոպարկ:
Աջակցելով «ԵՍ» կրթական հիմնադրամին և տեխնոպարկի նոր շենքի վերանորոգմանը՝ դու աջակցում ես Արցախի համայնքներում ապրող մի ամբողջ երիտասարդ սերնդի, օգնում ես նրանց ձեռք բերել աշխատաշուկայում պահանջված հմտություններ, աշխատանք գտնել և պատվերներ ընդունել աշխարհի տարբեր երկրներից՝ մնալով իրենց գյուղերում:
