Արդեն 3 տարի է, ինչ 18–ամյա Սոֆի Մինասյանը սովորում է Գյումրու ավիամոդելային ակումբում, ազատ ոճի թռչող անօդաչուներ է պատրաստում։ Պատմում է, որ փոքր ժամանակ երազում էր ռազմական օդաչու դառնալու մասին, բայց հիմա այլ նպատակներ ունի՝ մտածում է ռազմական անօդաչու թռչող սարքերի պատրաստմամբ զբաղվել։ Նրա ստեղծած մոդելների թռիչքը հասնում է մոտ 4 կմ բարձրության, դրանք 1 ժամից ավելի մնում են օդում, տարբեր հնարքներ կատարում։ Իսկ ահա հեռավորությունը կախված է հեռակառավարման վահանակից։
Սոֆին սովորում է նաև Իրական դպրոցի 4 –րդ կուրսում է։ Հմտանում է ծրագրավորման աշխարհում։ Ցանկանում է համատեղել ծրագրավորումն ու ինժեներությունը, այսինքն և՛ նախագծել, և՛ պատրաստել ԱԹՍ–ներ։ Ասում է, երբ երկնքում տեսնում է իր ձեռքով պատրաստած ավիամոդելի թռիչքը նոր մտքերով է լցվում, ու ցանկանում ավելի շատ աշխատել, իր հմտությունները զարգացնել։ Սոֆին կարևորում է նաև թե, ինչ արտադրության են ԱԹՍ–ների մասերը, ասում է, որ դրանք պետք է հայկական լինեն։
Թռչնի թռիչքը միշտ գերել է Սոֆիին։ Գուցե հենց դա էր պատճառը, որ սկսեց զբաղվել ավիամոդելավորմամբ ՝ թռչնի ճախրանքի բարձրության հասցնելով իր ստեղծած անօդաչուները։
