Շեքսպիրյան միջազգային թատերական փառատոնն արդեն 16-րդ անգամ է անցկացվում Հայաստանում։ Հիմնադիրը Թատերական գործիչների միության նախագահ Հակոբ Ղազանչյանն է։
Ամեն տարի փառատոնին մասնակցելու համար Հայաստան են գալիս տարբեր երկրների թատրոններ, թատերախմբեր, ազատ ստեղծագործողներ։ Նրանք բեմադրում են շեքսպիրյան պիեսները` ժամանակակից մոտեցումներով, հետաքրքիր փորձարկումներ են անում կերպարների հետ։
Այս տարի փառատոնն անցկացվելու է հոկտեմբերի 17-22ը։ Բացումը տեղի կունենա Սպենդիարյանի անվան օպերայի և բալետի ազգային ակադեմիական թատրոնի «Ռոմեո և Ջուլիետ» ներկայացմամբ։
Բացի այդ, հնարավորություն կունենաք դիտելու Սանկտ-Պետերբուրգի պատանի հանդիսատեսի թատրոնի «Ձմեռային հեքիաթ», Վրաստանի Շարժում թատերախմբի Սոնետներ, իտալական IM Perfect պարային խմբի «Ռոմեո և Ջուլիետ» ու ուրիշ շատ ներկայացումներ։
Հայաստան կժամանեն հեղինակավոր արվեստագետներ, միջազգային փառատոների տնօրեններ Իտալիայից, Հունգարիայից, Ռուսաստանից, Ֆրանսիայից և այլ երկրներից։
Կանցկացվեն նաև վարպետության դասեր։
