1985 թվականի հուլիսի 21ին գործարարի և դպրոցական ուսուցչի ընտանիքում ծնվել է Էլիզաբեթ Վուլրիջ Գրանտը, որն այսօր բոլորիս հայտնի է Լանա Դեյ Ռեյ անունով:
Լանան երգչուհի է, երգահան, պրոդյուսեր ու բանաստեղծ։ Նրա երաժշտությունը հայտնի է իր կինեմատիկական ոճով, տխրության, ողբերգական սիրավեպի, գլամուրի և մելանխոլիայի թեմաներով, որոնք պարունակում են բազմաթիվ տարրեր ամերիկայան փոփ-մշակույթից:
Երգչուհին մանկությունն անցկացրել է Լեյք Պլեյսիդ կոչվող փոքրիկ քաղաքում: Սովորել է այն դպրոցում, որտեղ մայրն էր աշխատում: Վաղ տարիքում Էլիզաբեթը սովորում էր վոկալ և երգում եկեղեցու երգչախմբում:
Լանայի հայրը ձեռներեց Ռոբ Գրանտն է: Նա իր գործունեությունը սկսել է 90-ականների վերջին և շատ արագ դարձել հաջողակ ձեռներեց ու միլիոնատեր: 2011 թվականին ստացել է «Տարվա լավագույն ներդրող» մրցանակը: Նա ֆինանսավորել է երգչուհու առաջին ալբոմը. այդ ժամանակ երգչուհին հանդես էր գալիս My Jailer անունով, իսկ 2008-ին նա գրանցվեց Myspace-ում Sparkle Jump Rope Queen անունով:
Աշխատել է որպես կամավոր, օգնել է հարբեցողներին և կարիքավորներին:
Նրա կուռքերն են Էլվիսը, Էմինեմը, Կուրտ Քոբեյնը:
15-ից 18 տարեկանում Էլիտար գիշերօթիկ քոլեջում գտնվելու ընթացքում, Լանան ալկոհոլից կախվածություն է ձեռք բերել:
Ամեն օր խմում էի, մենակ խմում էի: Երբ գրում եմ իմ կորցրածի մասին, գրում եմ նաև ալկոհոլի մասին. դա իմ առաջին սերն էր: Ալկոհոլն ամենավատ բանն է, որ պատահել է ինձ
Սովորել է Նյու Յորքի Բրոնքս նահանգի Ֆորդհեմի համալսարանում, որտեղ մասնագիտացել է մետաֆիզիկայի փիլիսոփայության բաժնում:
Երգչուհին 2010 թվականին թողարկել է Lizzy Grant անունով ալբոմ: Ձայնագրության պրոդյուսերն է Դեյվիդ Կանը, ով աշխատել է նաև Ռեգինա Սպեկտորի հետ։ Սակայն թողարկումն անհաջող էր և աննկատ մնաց:
Համաշխարհային համբավ Լանային բերեց համացանցը։ Առաջին տեսահոլովակը, որը թողարկվել է Լանա Դել Ռեյ անունով Video Games երգի համար, երեք շաբաթվա ընթացքում Յութուբում հավաքել է 600,000 դիտում. այսօր այդ թիվը հասել է 234 միլիոնի:
Լանան պայմանագրեր ուներ Next Model Management-ի հետ։ Նա նկարահանվել է H&M-ի,
Jaguar-ի և Gucci-ի գովազդային արշավներում։
Տարբեր տարիներին Լանայի երգերն օգտագործվել են Dior-ի, Քրիստոֆեր Քեյնի, Էմիլիո դե լա Մորենայի շոուներում։
Երգչուհու ձախ ձեռքին M դաջվածք կա՝ ի պատիվ նրա տատիկի՝ Մադլենի, ում հետ Լանան մանկության տարիներին շատ մտերիմ է եղել։ Նույն ձեռքի վրա դաջված է նաև «Դրախտ» բառը։ Աջ կողմում՝ «Ոչ ոքի չվստահել» արտահայտությունը, նույն տեղում՝ մատնեմատի վրա՝ «Մահացի՜ր երիտասարդ»:
Դել Ռեյը մի քանի ֆիլմերի սաունդթրեք է ձայնագրել։ Օրինակ՝ նրա վոկալը կարելի է լսել Թիմ Բարթոնի «Մեծ աչքեր» և Բազ Լուրմանի «Մեծն Գեթսբի» ստեղծագործություններում։
Լանան Vogue-ին տված հարցազրույցում ասել է, որ Լանա Դել Ռեյ անունը ծագել է նրանից, որ նա հաճախ է այցելում իսպանացի կուբացի ընկերներին Մայամիում.
«Լանա Դել Ռեյը հիշեցրեց մեզ դյութիչ ծովափը, — ասում է նա,- լեզվի ծայրին այն հիանալի էր հնչում»։
Լաուրա Մանուկյան
